ပျားသည် အင်းဆက်ပိုးတစ်မျိုးသာဖြစ်သော်လည်း လူသားတို့၏ကျန်းမာရေးအတွက် ပျားရည်၊ ပျားနို့၊ ပျားဝတ်မှုန်၊ ပျားကော်နှင့် ပျားဖယောင်း တို့ကို ထုတ်လုပ်ပေးခြင်းဖြင့် များစွာအကျိုးပြုလျက် ရှိပါသည်။

အဆိုပါ ပျားထွက်ပစ္စည်းများဖြင့် ရောဂါများကုသခြင်းကို ရှေးယခင်ကတည်းက အသုံးပြုခဲ့ကြ ပါသည်။ နောက်ဆုံး ပျားတုပ်ခံရသူပင် ပျားဆိပ်ကြောင့် ခန္ဓာကိုယ်ရှိရောဂါအချို့ကို သက်သာပျောက်ကင်း စေကြောင်း တွေ့ရှိခဲ့ရသည်။

ထိုမှမက ကမ္ဘာပေါ်ရှိသစ်ပင်ပန်းပင်များ မျိုးအောင်စေရန်အတွက် ဝတ်မှုန်ကူးခြင်းအလုပ်ကို လုပ်ဆောင်ပေးခြင်းကြောင့် ကမ္ဘာကြီးစိမ်းလန်းစိုပြေ၍ စားနပ်ရိက္ခာထုတ်လုပ်ရေး၌လည်း ပါဝင်ကူညီ ဆောင်ရွက်လျက်ရှိကြပါသည်။ ဤသို့သော ဂုဏ်ဒြပ်များပိုင်ဆိုင်လျက်ရှိသည့် ပျားမျိုးစုအားလုံးကို ဂုဏ်ပြုသောအားဖြင့် ဤစာအုပ်ကိုရေးသားတင်ပြလိုက်ရခြင်း ဖြစ်ပါသည်။